Oil Price Hike: દિવાળી પહેલાં ફરી એકવાર સિંગતેલ થયું મોંઘું, તેલનો ડબ્બો ₹ 3,050ની સપાટીએ પહોંચ્યો

દિવાળી પર્વ પહેલાં ગુજરાતમાં સિંગતેલના ભાવમાં ફરી તેજી જોવા મળી છે. બજારમાં વધુ ₹30ના વધારા સાથે સિંગતેલનો ડબ્બો ₹3,050ની સપાટીએ પહોંચ્યો છે. વેપારી વર્તુળોમાં આ ભાવ છેલ્લા લગભગ ત્રણ વર્ષના નોંધપાત્ર ઊંચા સ્તર તરીકે જોવામાં આવી રહ્યો છે.

અન્ય ખાદ્યતેલ નરમ, સિંગતેલમાં જ તેજી

મહત્ત્વની વાત એ છે કે અન્ય ખાદ્યતેલોના ભાવમાં નરમાશ જોવા મળી રહી છે, છતાં સિંગતેલ સતત મોંઘું થઈ રહ્યું છે. કપાસિયા તેલના ભાવમાં ઘટાડો નોંધાયો છે, જ્યારે પામતેલમાં પણ નરમાઈ જોવા મળી રહી છે. સૂર્યમુખી સહિતના અન્ય ખાદ્યતેલોના ભાવમાં પણ ખાસ વધારો થયો નથી. છતાં મગફળીમાંથી બનતું સિંગતેલ ગ્રાહકોને મોંઘું મળી રહ્યું છે.

ગુજરાત મગફળી ઉત્પાદનમાં અગ્રણી

ગુજરાત મગફળીના ઉત્પાદનમાં દેશનું અગ્રણી રાજ્ય છે. રાજ્યમાં સામાન્ય રીતે દર વર્ષે 50થી 55 લાખ ટન મગફળીનું ઉત્પાદન થાય છે, જ્યારે દેશના કુલ મગફળી ઉત્પાદનમાં ગુજરાતનો ફાળો 40%થી વધુ રહે છે. આ સ્થિતિમાં સિંગતેલના ભાવમાં સતત વધારો સામાન્ય ગ્રાહકો માટે ચિંતાનો વિષય બની રહ્યો છે.

ઉત્પાદન પાંચ વર્ષના સરેરાશ જેટલું

આ વર્ષે પણ મગફળીનું ઉત્પાદન બહુ નબળું રહેવાનો અંદાજ નથી. કૃષિ વિભાગના પ્રાથમિક અંદાજ મુજબ 2026-27માં ગુજરાતમાં આશરે 50.33 લાખ ટન મગફળીનું ઉત્પાદન થઈ શકે છે. રાજ્યનું પાંચ વર્ષનું સરેરાશ ઉત્પાદન પણ આશરે 50.21 લાખ ટન છે. એટલે કે મગફળીનું ઉત્પાદન સરેરાશની નજીક હોવા છતાં સિંગતેલના ભાવમાં રાહત જોવા મળી નથી.

પાંચ વર્ષમાં મગફળીનું ઉત્પાદન

આ આંકડા દર્શાવે છે કે ચાલુ વર્ષે ઉત્પાદન પાંચ વર્ષના સરેરાશની આસપાસ જ રહેવાની ધારણા છે.

તો પછી સિંગતેલ કેમ મોંઘું?

બજારમાં ચર્ચા છે કે દિવાળી દરમિયાન ખાદ્યતેલની વધતી માંગ, મગફળીના ઊંચા ભાવ અને બજારની અન્ય પરિસ્થિતિઓને કારણે સિંગતેલના ભાવમાં વધારો થઈ રહ્યો છે. ગ્રાહકોમાં સવાલ છે કે જ્યારે અન્ય ખાદ્યતેલોના ભાવ નરમ છે અને મગફળીનું ઉત્પાદન પણ સરેરાશ જેટલું રહેવાનો અંદાજ છે ત્યારે સિંગતેલમાં જ આટલો વધારો કેમ જોવા મળી રહ્યો છે.

ગ્રાહકોને 25-30% વધુ ભાવ ચૂકવવો પડે છે

હાલની સ્થિતિમાં ગયા વર્ષની સરખામણીએ ગ્રાહકોને સિંગતેલ માટે અંદાજે 25થી 30% સુધી વધુ ભાવ ચૂકવવાનો વારો આવી રહ્યો છે. દિવાળી દરમિયાન ઘરગથ્થુ વપરાશ વધે છે ત્યારે સિંગતેલના ઊંચા ભાવની સીધી અસર સામાન્ય પરિવારોના રસોડાના બજેટ પર પડી રહી છે.

આ પણ જુઓ

Watch onYouTube