ખાંડની નિકાસ પર લાગશે બ્રેક! શેરડીનો પાક ઘટતાં ભારત બની શકે આયાતકાર

મુંબઈ: સ્થાનિક બજારમાં ખાંડના પુરવઠાની ખેંચ અને અલ નીનોની અસરના કારણે શેરડીના ઉત્પાદનમાં ઘટાડાના કારણે આગામી સિઝનમાં ભારતના સાકર કારખાનાઓને દેશવાસીઓ માટે ખાંડનું ઉત્પાદન કરવામાં જ કમર કસવી પડે તેવી સ્થિતી છે. આવા સંજોગોમાં ભારત ખાંડની નિકાસ કરે તેવા સંજોગો બહુ ધુંધળા હોવાનું ઔદ્યોગિક સંસ્થા ઇસ્માએ જણાવ્યું છે.

ઇન્ડિયન શુગર એન્ડ બાયો એનર્જી મેન્યુફેક્ચર્સ એસોસિએશન (ISMA)ના જણાવ્યા અનુસાર, આગામી સિઝનમાં ભારતીય ખાંડ મિલો માટે પ્રથમ પ્રાથમિકતા સ્થાનિક વપરાશ માટે પૂરતો પુરવઠો જાળવવાની રહેશે. આવી સ્થિતિમાં ભારત નિકાસ માટે વધારાની ખાંડ ઉપલબ્ધ કરાવી શકે તેવી શક્યતા ઓછી છે. ISMAના ડાયરેક્ટર જનરલ દીપક બાલાણીએ જણાવ્યું કે હાલમાં શેરડીના ઉત્પાદન અંગે સર્વે ચાલી રહ્યો છે અને ઓક્ટોબરના ત્રીજા સપ્તાહમાં પાકની વાસ્તવિક સ્થિતિનું ચિત્ર સ્પષ્ટ થશે. જોકે, હાલના અહેવાલો મુજબ મહારાષ્ટ્ર અને કર્ણાટકમાં શેરડીના પાકને નુકસાન થયું છે.

મહારાષ્ટ્ર અને કર્ણાટકમાં દુષ્કાળની અસર

ઉલ્લેખનીય છે કે બે સપ્તાહ અગાઉ કર્ણાટક સરકારે રાજ્યનાં 100 જેટલા જિલ્લાને દુષ્કાળગ્રસ્ત જાહેર કર્યા હતા. વળી મહારાષ્ટ્ર સરકારે પણ હાલમાં 265 તાલુકાને એટલે કે રાજ્યનાં આશરે 75 ટકા વિસ્તારને અછતગ્રસ્ત જાહેર કર્યા છે. તેમણે ચિંતા વ્યક્ત કરી હતી કે આગામી સિઝનમાં વધારાનો પુરવઠો તો ઠીક પણ કદાચ સ્થાનિક વપરાશ માટે પણ વધારાની આયાત કરવી પડે તેવા સંજોગો છે.

આ પણ વાંચો: કોપરના ભાવમાં આવી શકે છે 50%નો ઉછાળો! Deutsche Bankનો તેજીમય અંદાજ

ભારતે આયાતનો વિકલ્પ ખુલ્લો રાખ્યો

યાદ રહે કે સરકારે 10 લાખ ટન રૉ સુગરની આયાતની પરવાનગી આપી છે. જેમાંથી આઠ લાખ ટનની આયાતને DGFTની મંજૂરી પણ મળી ગઇ છે. જો કે વૈશ્વિક બજારમાંથી વધારે ખાંડની આયાત કરવામાં કેવા ભાવે પડતર થાય છે તે જોવાનું રહેશે. સ્થાનિક બજારમાં હવે ફરી પાછા ખાંડનાં ભાવ વૈશ્વિક ભાવોની સરખામણીએ નીચા આવી ગયા છે. તેથી વધુ આયાત કરીને સ્થાનિક બજારમાં મોંઘી ખાંડ વેચાવી મુશ્કેલ બનશે.

બ્રાઝિલથી આયાત શરૂ

બ્રાઝિલથી આયાત કરવામાં આવેલી ખાંડના કેટલાક વેસલ ભારત પહોંચી ગયા હોવાના અહેવાલ છે. તહેવારોની સિઝનને ધ્યાનમાં રાખીને ઓક્ટોબર મહિના માટે સરકાર 23થી 25 લાખ ટન ખાંડનો ક્વોટા જાહેર કરે તેવી શક્યતા છે.

આ પણ જુઓ

Watch onYouTube