Bollywood એક્ટર ઑફિસ ભાડા પેટે કમાશે ₹14 કરોડ

ફિલ્મોની કમાણીથી અલગ, કોમર્શિયલ પ્રોપર્ટી નિયમિત આવકનો સ્રોત કેવી રીતે બની શકે છે તેનું ઉદાહરણ સૈફ અલી ખાનના તાજેતરના Rent Agreementમાં જોવા મળ્યું છે. બોલિવૂડ અભિનેતાએ મુંબઈના અંધેરી ઈસ્ટમાં આવેલી બે ઑફિસ મહિને ₹22.76 લાખના ભાડે આપી છે. પાંચ વર્ષના આ કરારમાં વાર્ષિક ભાડાવધારો પણ નક્કી કરવામાં આવ્યો છે.

રિયલ એસ્ટેટ એનાલિટિક્સ કંપની CRE Matrixએ મેળવેલા પ્રોપર્ટી રજિસ્ટ્રેશન દસ્તાવેજો અને મીડિયા અહેવાલ અનુસાર, બંને ઑફિસનો કુલ RERA કાર્પેટ એરિયા 5,692 ચોરસ ફૂટ છે. આ ઑફિસો અંધેરી–કુર્લા રોડ પર આવેલી પ્રીમિયમ કોમર્શિયલ ઇમારત Kanakia Wall Streetના ઉપરના માળે આવેલી છે. અભિનેતાએ આ મિલકત Durva Fintech Private Limitedને ભાડે આપવામાં આવી છે. આ ડીલ કંપનીના ડિરેક્ટર વિકાસ મોહન સચદેવાએ કરી હોવાની વિગતો છે. અહેવાલ મુજબ, માસિક ભાડું કાર્પેટ એરિયાના આધારે પ્રતિ ચોરસ ફૂટ આશરે ₹400 થાય છે.

60 મહિનાનો કરાર, દર વર્ષે 5% વધારો

લીઝ એન્ડ લાઇસન્સ કરાર 29 સપ્ટેમ્બર, 2026ના રોજ રજિસ્ટર થયો હતો. તેની 60 મહિનાની મુદત 10 મે, 2026થી 9 મે, 2031 સુધીની છે. કરારમાં દર વર્ષે ભાડામાં 5% વધારાની જોગવાઈ છે. આ વધારા સાથે પાંચ વર્ષ દરમિયાન ચૂકવવાનું કુલ બેઝ રેન્ટ ₹14 કરોડથી વધુ રહેશે, આ કિંમત GST વિનાની છે. આ રકમ ભાડાની આવક દર્શાવે છે; તેને મિલકતમાંથી થતો ચોખ્ખો નફો ગણાવી શકાય નહીં, કારણ કે સંબંધિત ખર્ચ અને કરની અલગ ગણતરી થાય છે.

₹2.36 કરોડની ડિપોઝિટ અને બે મહિનાની ભાડામુક્તિ

કરારમાં ₹2.36 કરોડની સિક્યોરિટી ડિપોઝિટ નક્કી કરવામાં આવી છે. આ રકમ શરૂઆતના માસિક ભાડાના 10 મહિનાથી વધુ જેટલી થાય છે. ભાડૂતને ઑફિસનું ઇન્ટિરિયર અને ફિટ-આઉટ કામ પૂર્ણ કરવા માટે 10 મેથી 9 જુલાઈ સુધી બે મહિનાનો ભાડામુક્ત સમયગાળો આપવામાં આવ્યો છે. ભાડાનું બિલિંગ 10 જુલાઈ, 2026થી શરૂ થવાનું નિર્ધારિત કરવામાં આવ્યું હતું.

નવેમ્બર 2025માં ₹30.75 કરોડમાં ખરીદી હતી

સૈફ અલી ખાને આ બંને કોમર્શિયલ યુનિટ તાજેતરમાં જ ખરીદ્યા હતા. Index-II પ્રોપર્ટી રેકોર્ડ મુજબ, નવેમ્બર 2025માં બંને ઑફિસની કુલ ખરીદકિંમત ₹30.75 કરોડ હતી. બંને ખરીદીના વ્યવહારો 18 નવેમ્બર, 2025ના રોજ રજિસ્ટર થયા હતા. દસ્તાવેજોમાં વેચનાર તરીકે Apicore Pharmaceuticals Private Limitedનું નામ રજીસ્ટર્ડ છે. ખરીદકિંમતની સરખામણીએ લાંબા ગાળાનો ભાડાકરાર આ રોકાણમાંથી આવકની સ્પષ્ટતા આપે છે. જોકે, વાસ્તવિક વળતરનું મૂલ્યાંકન કરતી વખતે ભાડામુક્ત સમયગાળો, ખર્ચ, કર અને અન્ય કરારની શરતો ધ્યાનમાં લેવી પડે છે.

બાંદ્રામાં 6,500 ચોરસ ફૂટનું નિવાસસ્થાન

સૈફ અલી ખાન મુંબઈમાં રહેણાક મિલકત પણ ધરાવે છે. તેઓ હાલમાં બાંદ્રા વેસ્ટની સતગુરૂ સરણ ઇમારતમાં આવેલા 6,500 ચોરસ ફૂટના લક્ઝરી એપાર્ટમેન્ટમાં રહે છે. તેમણે આ એપાર્ટમેન્ટ એપ્રિલ 2012માં ₹23.50 કરોડમાં ખરીદ્યું હતું. અંધેરીની ઑફિસોનો ભાડાકરાર તેમના મુંબઈના રિયલ એસ્ટેટ રોકાણમાં કોમર્શિયલ મિલકતનું મહત્વ દર્શાવે છે.

Starlinkની પણ ઑફિસ ડીલ

અંધેરી અને આસપાસના વિસ્તારમાં અન્ય કંપનીઓના કોમર્શિયલ વ્યવહારો પણ નોંધાયા છે. કાંદીવલી વિસ્તારમાં Elon Muskની સેટેલાઇટ ઇન્ટરનેટ કંપની સ્ટારલિંક સેટેલાઈટ કોમ્યુનિકેશનએ 1,294 ચોરસ ફૂટની ઑફિસ પાંચ વર્ષ માટે ભાડે લીધી છે. આ કરારનું કુલ ભાડું ₹2.33 કરોડ છે.

આ પણ વાંચો: ભારતમાં સિનેમાથી ઘરના સોફા સુધી Popcornનો બિઝનેસ કેટલો

આ પણ જુઓ:

Watch onYouTube