₹2,000થી વધુના UPI પેમેન્ટ પર લાગશે 0.4% ચાર્જ? જાણો કોને થશે અસર

UPI પેમેન્ટને લઈને મોટો ફેરફાર સામે આવ્યો છે. 15 ઓક્ટોબરથી પસંદગીના Person-to-Merchant એટલે કે P2M UPI પેમેન્ટ પર Merchant Discount Rate એટલે કે MDR લાગુ કરવાની જાહેરાત કરવામાં આવી છે. આ વ્યવસ્થામાં ₹2,000થી વધુના વ્યવહાર પર વેપારી પાસેથી 0.4% ચાર્જ લેવામાં આવશે. જોકે, ગ્રાહકો માટે રાહત એ છે કે UPI પેમેન્ટ કરવા બદલ તેમની પાસેથી કોઈ ચાર્જ લેવામાં આવશે નહીં. Person-to-Person એટલે કે એક વ્યક્તિથી બીજી વ્યક્તિને કરવામાં આવતા UPI ટ્રાન્સફર પણ મફત રહેશે.

₹2,000 સુધીના પેમેન્ટ પર ચાર્જ નહીં

નવી વ્યવસ્થા હેઠળ ₹2,000 સુધીના P2M UPI વ્યવહાર પર MDR શૂન્ય રહેશે. ઉપલબ્ધ માહિતી મુજબ આવા વ્યવહારો UPIના P2M વ્યવહારના 95%થી વધુ છે. એટલે રોજિંદા નાના UPI પેમેન્ટ પર નવી ફીની સીધી અસર નહીં થાય.

₹3,000ના પેમેન્ટ પર ₹12 ચાર્જ

₹2,000થી વધુના વ્યવહારોમાં 0.4%ના દરે MDR લાગશે. ઉદાહરણ તરીકે ₹3,000ના પેમેન્ટ પર ₹12 ચાર્જ, ₹50,000ના પેમેન્ટ પર ₹200 ચાર્જ, ₹75,000ના પેમેન્ટ પર ગણતરી પ્રમાણે ₹300 અને ₹1 લાખના પેમેન્ટ પર પણ મહત્તમ ₹300 ચાર્જ લાગશે. એટલે ₹75,000થી વધુના વ્યવહાર માટે ચાર્જ ₹300 સુધી મર્યાદિત રહેશે.

નાના વેપારીઓને રાહત

નવી વ્યવસ્થામાં નાના વેપારીઓને પણ રાહત આપવામાં આવી છે. UPI QR દ્વારા મહિનામાં ₹1 લાખ સુધીની રકમ મેળવનારા નાના વેપારીઓ MDRમાંથી મુક્ત રહેશે. આ ઉપરાંત કેટલાક ક્ષેત્રો માટે સામાન્ય 0.4% કરતાં ઓછો અથવા નિશ્ચિત ચાર્જ રાખવામાં આવ્યો છે. રેલવે, ટેલિકોમ, વીમા અને ઈંધણ જેવા પસંદગીના ક્ષેત્રોમાં ₹2,000થી વધુના વ્યવહાર પર ₹5નો નિશ્ચિત MDR રહેશે.

આ પણ વાંચો: ભારતમાં બેરોજગારી ઘટીને છેલ્લા 6 મહિનાના સૌથી નીચા સ્તરે પહોંચી, ગામડાંમાં રોજગારમાં સુધારો

શેરબજાર અને મ્યુચ્યુઅલ ફંડ માટે અલગ દર

કેપિટલ માર્કેટ સાથે જોડાયેલા વ્યવહારો માટે પણ અલગ દર નક્કી કરવામાં આવ્યો છે. મ્યુચ્યુઅલ ફંડ, શેરબ્રોકર અને સિક્યોરિટીઝ ડીલર જેવા વ્યવહારો પર 0.02% MDR લાગશે, જેની મહત્તમ મર્યાદા ₹300 રહેશે. આ નવી વ્યવસ્થાનો હેતુ UPI વ્યવસ્થાના માળખા, સાયબર સુરક્ષા, નવીનતા અને ગ્રાહક સેવામાં વધુ રોકાણ માટે ટકાઉ આવકનું માળખું ઊભું કરવાનો છે.