ચીનની ચિપ રેસમાં દક્ષિણ કોરિયા પાછળ પડ્યું? શેરબજારમાં હાહાકાર, ટ્રેડિંગ રોકવું પડ્યું

દક્ષિણ કોરિયાનું શૅરબજાર આ વર્ષે દુનિયામાં સૌથી સારો દેખાવ કરનારું બજાર છે. તેનું કારણ સેમીકન્ડક્ટર ચિપના શૅરોમાં આવેલી તેજી છે. પરંતુ છેલ્લા કેટલાક દિવસમાં આ શૅર શૅરબજાર માટે મુશ્કેલીનું કારણ બની ગયા છે. મંગળવારે બેન્ચમાર્ક કોસ્પી ઈન્ડેક્સ 7 ટકાથી વધૂ તૂટ્યો હતો, જેથી થોડાક સમય માટે ટ્રેડિંગ રોકવું પડ્યું હતું. પાંચ દિવસમાં તેમાં 15 ટકાનો ઘટાડો આવ્યો છે. દક્ષિણ કોરિયાની કંપનીઓને ચીન તરફથી આકરી ટક્કર મળવાની સંભાવનાથી કોરિયન કંપનીઓ પર રોકાણકારોનો વિશ્વાસ ડગમગી રહ્યો છે.

અમેરિકન મેમરી-ચિપ બનાવતી કંપની માઈક્રોન ટેક્નોલોજીના શૅરોમાં સોમવારે ઘટાડો આવ્યો હતો. તેની અસર મંગળવારે દક્ષિણ કોરિયામાં પણ જોવા મળી. તાજેતરમાં લિસ્ટ થયેલી ચીનનીકંપની CXMTએ જે રીતે પ્રોગ્રેસ કરી છે, તેનાથી વૈશ્વિક મેમરી-ચિપ કંપનીઓમાં ગભરાટ ફેલાયેલો છે.

કોરિયા એક્સચેન્જે સ્થાનિક સમય મુજબ સવારે 9.47 કલાકે પાંચ મિનિટ માટે પ્રોગ્રામ સેલ ઓર્ડર અટકાવી દીધા, જ્યારે કોસ્પી 200 ફ્યુચર્સ ઈન્ડેક્સ 5.08 ટકા અથવા 51.20 પોઈન્ટ ગગડીને 955.02 પર આવી ગયો. તેમાં સતત પાંચમા સત્રમાં ઘટાડો જોવા મળ્યો છે. સપ્ટેમ્બર 2024 બાદ આ ઈન્ડેક્સમાં ઘટાડાનો આ સૌથી લાંબો સમય છે. નિષ્ણાતોનું કહેવું છે કે ચીનની કંપનીઓ વૈશ્વિક પ્રતિસ્પર્ધીઓ સાથે ટેક્નોલોજીનું અંતર તિવ્ર ગતિએ ઘટાડી રહી છે. તેનાથી દક્ષિણ કોરિયાના શૅરબજાર પર દબાણ પડી રહ્યું છે.

રોકાણકારોએ 2,065.3 અબજ વૉન વેચ્યા

સેમસંગ ઈલેક્ટ્રોનિક્સના શૅરોમાં 7.39 ટકાનો ઘટાડો આવ્યો જ્યારે એસકે હાઈનિક્સ 10 ટકાથી વધુ તૂટ્યો. આ ઘટાડો માત્ર ટેક્નોલોજી શૅરો સુધી મર્યાદિત નથી રહ્યો. બેટરી બનાવતી કંપની LG એનર્જી સોલ્યુશનમાં પણ 4.15 ટકાનો ઘટાડો નોંધાયો હતો. હ્યુન્ડઈ મોટરમાં 5.78 ટકા અને કિઆ કોર્પમાં 3.52 ટકાની નરમાઈ જોવા મળી. અન્ય મોટા શૅરોમાં POSCO હોલ્ડિંગ્સમાં 4.85 ટકા જ્યારે સેમસંગ બાયોલોજિક્સ 1 ટકા ગગડ્યા.

કોસ્પિ ઈન્ડેક્સના 915 શૅરોમાંથી 832 શૅરોમાં ઘટાડો આવ્યો જ્યારે 66 શૅરોમાં તેજી જોવા મળી. વિદેશી રોકાણકારોએ 2,065.3 અબજ વૉનના દક્ષિણ કોરિયન શૅર વેચ્યા જેનાથી ઈક્વિટી પર વેચવાલીનું દબાણ વધી ગયું. કરન્સી બજારમાં દક્ષિણ કોરિયન કરન્સી વૉન 0.22 ટકા નબળી થઈ પ્રતિ ડોલર 1,338.8 પર આવી ગઈ. તેનો પાછલો બંધ ભાવ 1,335.8 હતો. માર્કેટમાં ઉથલ-પાથલ વચ્ચે દક્ષિણ કોરિયન સરકારી બોન્ડ યીલ્ડમાં પણ ઘટાડો જોવા મળ્યો.

આ પણ જૂઓ

Watch onYouTube