Namo Bharat Record: 5 કરોડ ટ્રિપનો આંકડો પાર, માત્ર 93 દિવસમાં 1 કરોડ નવી મુસાફરી

દિલ્હી-ગાઝિયાબાદ-મેરઠ વચ્ચે ઝડપી અને આધુનિક કનેક્ટિવિટી પૂરી પાડતી Namo Bharat ટ્રેનએ મહત્વપૂર્ણ સિદ્ધિ હાંસલ કરી છે. Namo Bharat કોરિડોર પર કુલ કમ્યુટર જર્નીની સંખ્યા 5 કરોડને પાર થઈ ગઈ છે. ખાસ વાત એ છે કે છેલ્લી 1 કરોડ કમ્યુટર જર્ની માત્ર 93 દિવસમાં નોંધાઈ છે, જે કોરિડોર પર મુસાફરોની વધતી સંખ્યા તરફ ઈશારો કરે છે.

2023માં શરૂ થઈ હતી Namo Bharat

NCRTC અનુસાર, Namo Bharat કોરિડોરનું સંચાલન 21 ઑક્ટોબર 2023ના રોજ સાહિબાબાદથી દુહાઈ ડેપો વચ્ચેના 17 કિલોમીટર લાંબા પ્રાથમિક સેક્શનથી શરૂ થયું હતું. ત્યારબાદ કોરિડોર પર મુસાફરોની સંખ્યામાં સતત વધારો નોંધાયો છે. ઓપરેશન શરૂ થયાના 574 દિવસ બાદ એટલે કે 16 મે 2025ના રોજ પ્રથમ વખત 1 કરોડ કમ્યુટર જર્નીનો આંકડો પાર થયો હતો. ત્યારબાદ 11 ડિસેમ્બર 2025ના રોજ 211 દિવસમાં 2 કરોડ કમ્યુટર જર્ની પૂર્ણ થઈ હતી. 2 મે 2026ના રોજ 143 દિવસમાં 3 કરોડ અને 10 ઑગસ્ટ 2026ના રોજ માત્ર 101 દિવસમાં 4 કરોડ કમ્યુટર જર્નીનો આંકડો નોંધાયો હતો. હવે 10 નવેમ્બર 2026ના રોજ 5 કરોડનો આંકડો પાર થયો છે. આ વખતે માત્ર 93 દિવસમાં વધુ 1 કરોડ કમ્યુટર જર્ની નોંધાઈ છે.

એક વર્ષમાં 3 કરોડથી વધુ કમ્યુટર જર્ની

ડિસેમ્બર 2025માં Namo Bharat કોરિડોર પર 2 કરોડ કમ્યુટર જર્ની નોંધાઈ હતી, જે નવેમ્બર 2026 સુધીમાં વધીને 5 કરોડ થઈ ગઈ છે. એટલે કે લગભગ એક વર્ષના સમયગાળામાં 3 કરોડથી વધુ કમ્યુટર જર્ની નોંધાઈ છે. આ દરમિયાન 22 ફેબ્રુઆરી 2026ના રોજ સમગ્ર Namo Bharat કોરિડોરની સાથે મેરઠ મેટ્રોનું પણ મુસાફરો માટે સંચાલન શરૂ થયું હતું. તેના કારણે દિલ્હી, ગાઝિયાબાદ અને મેરઠ વચ્ચે જાહેર પરિવહનની કનેક્ટિવિટી વધુ સારી બની છે.

દૈનિક રાઇડરશિપમાં પણ વધારો

છેલ્લા ત્રણ મહિનાના આંકડા પણ Namo Bharatની વધતી રાઇડરશિપ દર્શાવે છે. ઑગસ્ટ 2026માં કોરિડોર પર કુલ 35.25 લાખ કમ્યુટર જર્ની નોંધાઈ હતી અને સરેરાશ દૈનિક રાઇડરશિપ 1,13,708 રહી હતી. 28 ઑગસ્ટે 1,68,666 મુસાફરોએ Namo Bharatમાં સફર કરી હતી, જે અત્યાર સુધીની સૌથી વધુ દૈનિક રાઇડરશિપ હતી. સપ્ટેમ્બર 2026માં આશરે 32.41 લાખ કમ્યુટર જર્ની નોંધાઈ હતી અને સરેરાશ દૈનિક રાઇડરશિપ 1,08,043 રહી હતી. જ્યારે ઑક્ટોબરમાં કુલ 33.49 લાખ કમ્યુટર જર્ની નોંધાઈ હતી અને સરેરાશ દૈનિક રાઇડરશિપ 1,08,049 રહી હતી. સળંગ ત્રણ મહિના સુધી દર મહિને 32 લાખથી વધુ મુસાફરોની સફર નોંધાવાથી Namo Bharat દિલ્હી-NCR અને પશ્ચિમ ઉત્તર પ્રદેશના લોકોની રોજિંદી મુસાફરીમાં મહત્વપૂર્ણ બની રહી હોવાનો સંકેત મળે છે.

ઝડપી મુસાફરી અને કનેક્ટિવિટીથી વધ્યો વિશ્વાસ

Namo Bharat પ્રત્યે મુસાફરોના વધતા વિશ્વાસ પાછળ ઝડપી ગતિ, વિશ્વસનીય સંચાલન અને મલ્ટીમોડલ કનેક્ટિવિટી જેવા પરિબળો મહત્વપૂર્ણ હોવાનું જણાવાયું છે. દિલ્હી, ગાઝિયાબાદ અને મેરઠ વચ્ચે નોકરી, શિક્ષણ, વ્યવસાય અને અન્ય કામ માટે રોજિંદી મુસાફરી કરતા લોકોને આ કોરિડોરથી સુવિધા મળી રહી છે. દિલ્હી મેટ્રો, ભારતીય રેલવે, આંતરરાજ્ય બસ ટર્મિનલ અને સિટી બસ સેવાઓ સાથે Namo Bharatનું ઇન્ટરચેન્જ મુસાફરો માટે મુસાફરીને વધુ સરળ બનાવે છે.

આ પણ વાંચો: Global Cues । 12 November 2026: GIFT Niftyથી Wall Street સુધી ક્યાં જોવા મળી રહી છે તેજી અને મંદી

આ પણ જુઓ :