સોનાના ભાવમાં મોટો ઘટાડો: વિશ્વમાં 21% તૂટ્યું, ભારતમાં કેમ માત્ર 15%? જુઓ રિપોર્ટ

Gold Price: જો તમે સોનામાં રોકાણ કર્યું છે અથવા નવું સોનું ખરીદવાનું વિચારી રહ્યા છો, તો આ અહેવાલ તમારા માટે ખૂબ જ મહત્વપૂર્ણ છે. વર્ષ 2026 માં સોનાના ભાવમાં વૈશ્વિક સ્તરે મોટો ઘટાડો નોંધાયો છે, પરંતુ ભારતીય બજારમાં તેની અસર ઘણી મર્યાદિત જોવા મળી છે. આંતરરાષ્ટ્રીય બજારોમાં જાન્યુઆરી 2026 ની રેકોર્ડ ઊંચાઈથી સોનાના ભાવમાં 21.4 ટકાનો ભારે ઘટાડો થયો છે. તેની સરખામણીમાં, ભારતીય રૂપિયાના સંદર્ભમાં સ્થાનિક બજારમાં આ ઘટાડો માત્ર 14.9 ટકા સુધી જ સીમિત રહ્યો છે. એક્સિસ મ્યુચ્યુઅલ ફંડના એક વિસ્તૃત અહેવાલમાં આ પાછળના કારણો સમજાવવામાં આવ્યા છે.

ભારતમાં સોનાના ભાવને કેમ મળ્યો ટેકો?

ભારતીય બજારમાં સોનાના ભાવમાં વૈશ્વિક બજાર જેટલો કડાકો ન બોલવા પાછળ મુખ્યત્વે 2 પરિબળો જવાબદાર છે:

રૂપિયાની નબળાઈ: વર્ષ 2026 માં અમેરિકન ડોલર સામે ભારતીય રૂપિયો 89 ના સ્તરથી નબળો પડીને 96 ની આસપાસ પહોંચી ગયો હતો. જ્યારે રૂપિયો નબળો પડે છે, ત્યારે આંતરરાષ્ટ્રીય બજારમાંથી ડોલરમાં ખરીદવામાં આવતું સોનું ભારતમાં મોંઘુ પડે છે, જેનાથી સ્થાનિક કિંમતો જળવાઈ રહે છે.

આયાત ડ્યૂટીમાં જંગી વધારો: માર્ચ 2026 માં, ભારત સરકારે સોના પરની આયાત ડ્યૂટી 6 ટકાથી વધારીને સીધી 15 ટકા કરી દીધી હતી. આ આકરા ટેક્સ વધારાને કારણે વિદેશથી આવતા સોનાની પડતર કિંમતમાં વધારો થયો, જેણે સ્થાનિક બજારમાં ભાવને વધુ ઘટતા અટકાવ્યા.

આંતરરાષ્ટ્રીય બજારમાં સોનું કેમ ગગડ્યું?

રિપોર્ટ અનુસાર, જાન્યુઆરી 2026 માં સોનું જ્યારે તેની ઐતિહાસિક ટોચ પર હતું, ત્યારે રોકાણકારોએ મોટા પાયે નફો બુક કરવાનું શરૂ કર્યું. આ ઉપરાંત, લોન લઈને કરવામાં આવતા રોકાણોમાં ઘટાડો થવાથી સોનાના વેચાણમાં વધારો થયો. ભાવ ઘટવાની શરૂઆત થતાં જ ઘણા ટ્રેડર્સના સ્ટોપ-લોસ (Stop-Loss) હિટ થયા અને તેમને માર્જિન કોલનો સામનો કરવો પડ્યો, જેનાથી બજારમાં વેચવાલીનું દબાણ વધુ તીવ્ર બન્યું.

ભૌગોલિક રાજકીય તણાવ અને અમેરિકન નીતિઓની અસર

યુએસ (અમેરિકા) અને ઈરાન વચ્ચેના સંઘર્ષે પણ સોનાના બજાર પર મોટી અસર કરી છે. ક્રૂડ ઓઈલના પુરવઠામાં વિક્ષેપ પડતા અને ગલ્ફ દેશો પર આર્થિક દબાણ વધતા રોકાણકારો પાસે વધારાના ભંડોળની અછત ઊભી થઈ, જેના કારણે તેમણે પહેલેથી ખરીદેલું સોનું વેચવાનું શરૂ કર્યું. વધુમાં, તેલના વધતા ભાવોને કારણે ફુગાવો (મોંઘવારી) વધવાનો ભય ઊભો થયો, જેનાથી અમેરિકામાં વ્યાજ દરો લાંબા સમય સુધી ઊંચા રહેવાની શક્યતાઓ મજબૂત બની. ઊંચા વ્યાજ દરોને કારણે યુએસ બોન્ડ અને ડોલર વધુ મજબૂત બન્યા, જેણે સોનાના ભાવ પર ભારે દબાણ સર્જ્યું.

આગામી 6 થી 12 મહિનાનો અંદાજ

એક્સિસ મ્યુચ્યુઅલ ફંડનું માનવું છે કે ટૂંકા ગાળાના પડકારો હોવા છતાં, લાંબા ગાળે સોનામાં રોકાણ સકારાત્મક પરિણામ આપી શકે છે. અમેરિકાની વધતી જતી બજેટ ખાધ, દેવા ચૂકવવાનો વધતો ખર્ચ, આર્થિક નબળાઈ અને સરકારી નીતિઓની અનિશ્ચિતતા ભવિષ્યમાં ડોલરને નબળો પાડી શકે છે, જે સોના માટે ફાયદાકારક સાબિત થશે. દુનિયાભરની કેન્દ્રીય બેંકો પણ સતત સોનું ખરીદી રહી છે. આંકડાઓ મુજબ, 2026 ના પ્રથમ ક્વાર્ટરમાં કેન્દ્રીય બેંકોએ 57 ટન અને બીજા ક્વાર્ટરમાં 289 ટન સોનું ખરીદ્યું હતું. આમ, 2026 ના પહેલા છ મહિનામાં કુલ 345 ટન સોનાની ખરીદી થઈ. ઓગસ્ટ મહિનામાં વધુ 39 ટન સોનું ખરીદવામાં આવ્યું. આ વૈશ્વિક ખરીદીમાં પોલેન્ડ, ચીન અને ઉઝબેકિસ્તાને સૌથી મોટી ભૂમિકા ભજવી છે.

આ પણ વાંચોઃ સોના-ચાંદીના ભાવમાં કડાકો: 10 નવેમ્બરે 24K અને 22K સોનું કેટલું સસ્તું થયું? જુઓ રેટ

આ પણ જુઓ

Watch onYouTube