નવા વર્ષના વધામણાં માટે ફૂલોની ખરીદીમાં ઉછાળો! ગલગોટા અને ગુલાબની માંગ વધી

નવા વર્ષને ફૂલોથી વધાવવા માટે ગુજરાતીઓ તૈયાર છે. અમદાવાદના 37 વર્ષ જૂના જમાલપુર ફૂલ બજારમાં નવરાત્રી દરમિયાન નિરાશા જોવા મળ્યા બાદ હવે નવા વર્ષના આગમન પહેલાં ફૂલોની માંગમાં વધારો થયો છે. ફૂલ બજારમાં વહેલી સવારથી જ ખરીદદારોની ભીડ જોવા મળી રહી છે. ગુલાબ અને ગલગોટા ઉપરાંત શેવંતી, કમળ અને લીલીની માંગમાં પણ વધારો જોવા મળ્યો છે. ઘરનું ઉંબરો શણગારવાથી લઈને પૂજાઅર્ચના અને રંગોળી સજાવવા સુધી ફૂલોનું મહત્વ હોવાથી બજારમાં ખરીદી વધી છે.

ગલગોટા અને ગુલાબની મોટી માંગ

નવા વર્ષના સ્વાગત માટે શહેરમાં આશરે દોઢ લાખ કિલો ગલગોટા અને 30 હજાર કિલો ગુલાબની માંગ રહેવાનો અંદાજ છે. દિવાળી દરમિયાન બજારમાં ફૂલોની ખરીદી માટે લોકોની મોટી ભીડ જોવા મળી હતી અને નવા વર્ષ પહેલાં પણ વેપારીઓને સારા વેપારની આશા છે. જમાલપુર ફૂલ બજારના વેપારીઓના જણાવ્યા મુજબ, આ બજાર માત્ર ફૂલોની ખરીદી-વેચાણનું કેન્દ્ર નથી. અમદાવાદની કાપડ મિલોનું જીવંત ઉદાહરણ પણ આ બજાર સાથે જોડાયેલું છે. બજારમાં 37 વર્ષ કરતાં વધુ જૂની અનેક ફૂલોની દુકાનો છે.

દિવાળી બાદ ગલગોટાના ભાવમાં વધારો

વેપારીઓના જણાવ્યા મુજબ નવરાત્રી દરમિયાન ગલગોટાની 10 કિલોની થેલી આશરે ₹300 સુધીમાં મળતી હતી. દિવાળી દરમિયાન તેનો ભાવ વધીને આશરે ₹900 સુધી પહોંચ્યો હતો. ફૂલ બજારમાં પરંપરાગત ફૂલોની સાથે આધુનિક સજાવટ માટેના ફૂલોની પણ માંગ જોવા મળી રહી છે. વેપારીઓનું કહેવું છે કે તહેવારો દરમિયાન પૂજા, તોરણ અને શણગાર માટે ફૂલોની માંગ વધતી હોય છે.

નવા વર્ષ માટે વેપારીઓને સારા વેપારની આશા

નવા વર્ષના આગમન સાથે ફૂલ બજારમાં ફરીથી ખરીદી વધવાની આશા છે. વેપારીઓના જણાવ્યા મુજબ નવરાત્રી દરમિયાન અપેક્ષા મુજબની ખરીદી ન થતાં બજારમાં નિરાશા હતી, પરંતુ દિવાળી અને નવા વર્ષના તહેવારોને કારણે વેપારમાં સુધારો જોવા મળી રહ્યો છે. ગુલાબ, ગલગોટા, શેવંતી, કમળ અને લીલી જેવા ફૂલોની માંગ સાથે નવા વર્ષના સ્વાગત માટે બજારમાં ગ્રાહકોની અવરજવર વધતા વેપારીઓને સારા કારોબારની આશા છે.

આ પણ વાંચો: Stocks In News | 09 November 2026: આજે કયા Top Share ફોકસમાં રહી શકે

આ પણ જુઓ :

Watch onYouTube