રોકાણકારો SIP કેમ બંધ કરી રહ્યા છે? ઓક્ટોબરમાં સ્ટોપેજ રેશિયો વધીને 116% થયો

SIP Stoppage Ratio: મ્યુચ્યુઅલ ફંડમાં રોકાણ કરવા માટે સિસ્ટમેટિક ઇન્વેસ્ટમેન્ટ પ્લાન (SIP) ભારતીય રોકાણકારોમાં ખૂબ જ લોકપ્રિય છે. પરંતુ, તાજેતરમાં ઓક્ટોબર 2026 ના આંકડાઓ એક નવો જ ટ્રેન્ડ દર્શાવી રહ્યા છે. સળંગ પાંચ મહિના સુધી SIP સ્ટોપેજ રેશિયોમાં ઘટાડો નોંધાયા બાદ, ઓક્ટોબર મહિનામાં આ રેશિયો અચાનક ઉછળીને 116 ટકાની આસપાસ પહોંચી ગયો છે. સરળ શબ્દોમાં કહીએ તો, નવા રોકાણકારો જેટલા જોડાયા તેના કરતાં વધુ લોકોની SIP ની મુદત પૂરી થઈ છે અથવા તો તેમણે તેને અધવચ્ચેથી બંધ કરી છે. એસોસિએશન ઓફ મ્યુચ્યુઅલ ફંડ્સ ઇન ઇન્ડિયા (AMFI) ના કામચલાઉ ડેટા મુજબ, ઓક્ટોબર 2026 માં SIP સ્ટોપેજ રેશિયો અંદાજિત 115.7 ટકા નોંધાયો છે, જે સપ્ટેમ્બર મહિનામાં માત્ર 78.5 ટકા હતો. આ આંકડાઓ દર્શાવે છે કે એપ્રિલથી સપ્ટેમ્બર સુધી ચાલી રહેલો ઘટાડાનો દોર હવે બદલાયો છે.

આંકડાકીય માહિતી પર નજર કરીએ તો, ઓક્ટોબર મહિનામાં લગભગ 59 લાખ જેટલી SIP બંધ કરવામાં આવી છે અથવા તો તેનો નિર્ધારિત કાર્યકાળ પૂરો થયો છે. તેની સામે આ જ સમયગાળા દરમિયાન 51 લાખ નવા SIP રજિસ્ટ્રેશન થયા છે. આનો સીધો અર્થ એ નીકળે છે કે નોંધાયેલા દર 100 નવા SIP રજિસ્ટ્રેશન સામે લગભગ 116 જૂની SIP બંધ થઈ છે કે પૂરી થઈ છે.

જો આ આંકડાની સરખામણી સપ્ટેમ્બર મહિના સાથે કરીએ તો મોટો તફાવત જોવા મળે છે. સપ્ટેમ્બરમાં 63.26 લાખ નવા રજિસ્ટ્રેશન થયા હતા અને 49.68 લાખ SIP બંધ થઈ હતી. આમ, ઓક્ટોબરમાં નવા રજિસ્ટ્રેશનમાં માસિક ધોરણે આશરે 19.4 ટકાનો મોટો ઘટાડો નોંધાયો છે, જ્યારે બંધ થયેલી અથવા પૂરી થયેલી SIP ની સંખ્યામાં લગભગ 18.8 ટકાનો વધારો જોવા મળ્યો છે. આ બંને પરિબળો ભેગા થવાને કારણે સ્ટોપેજ રેશિયો 100 ટકાની ઉપર જતો રહ્યો છે. સપ્ટેમ્બરની તુલનામાં આ ગુણોત્તરમાં 37.2 ટકાનો તોતિંગ વધારો થયો છે.

રોકાણના આર્થિક પ્રવાહની વાત કરીએ તો, સપ્ટેમ્બરમાં SIP દ્વારા આવતું માસિક ભંડોળ તેના સર્વોચ્ચ શિખરે એટલે કે 32,490 કરોડ રૂપિયા પર પહોંચ્યું હતું. ઓક્ટોબરમાં તેમાં 328 કરોડ રૂપિયાનો (લગભગ 1 ટકા) નજીવો ઘટાડો થયો છે અને કુલ માસિક યોગદાન 32,162 કરોડ રૂપિયા રહ્યું છે. આમ છતાં, બજાર માટે આ એક સકારાત્મક બાબત છે કે માસિક કલેક્શન હજુ પણ 32,000 કરોડ રૂપિયાની મજબૂત સપાટીની ઉપર જળવાઈ રહ્યું છે.

એપ્રિલથી ઓક્ટોબર 2026 સુધીના સ્ટોપેજ રેશિયોના ટ્રેન્ડ પર નજર કરીએ તો: એપ્રિલમાં 101.14 ટકા, મેમાં 95.46 ટકા, જૂનમાં 91.23 ટકા, જુલાઈમાં 81.87 ટકા, ઓગસ્ટમાં 81.05 ટકા અને સપ્ટેમ્બરમાં 78.53 ટકા નોંધાયો હતો. આ સાત મહિનાના સમયગાળામાં ઓક્ટોબરનો 115.69 ટકાનો રેશિયો સૌથી વધુ છે.

જોકે, નિષ્ણાતો માને છે કે સામાન્ય રોકાણકારે માત્ર આ સ્ટોપેજ રેશિયો જોઈને ગેરમાર્ગે દોરાવાની જરૂર નથી. SIP સ્ટોપેજ રેશિયો 100 ટકાથી વધુ હોવાનો મતલબ એવો બિલકુલ નથી કે 100 ટકાથી વધુ રોકાણકારો બજારમાંથી નાણાં પાછા ખેંચી રહ્યા છે અથવા ગભરાઈને અકાળે રોકાણ બંધ કરી રહ્યા છે. આ બંધ કરાયેલા આંકડામાં એવી SIP પણ સામેલ હોય છે જેણે પોતાનો નિર્ધારિત કાર્યકાળ પૂરો કર્યો હોય અને તે સહજ રીતે પૂર્ણ થઈ હોય. મ્યુચ્યુઅલ ફંડમાં રોકાણકારોનો વિશ્વાસ અકબંધ છે કે નહીં તે જાણવા માટે કુલ માસિક યોગદાન, બાકી SIP એકાઉન્ટ્સ અને ચાલુ ખાતાઓની સંખ્યા જોવી વધુ યોગ્ય છે, જે હજુ પણ દર્શાવે છે કે રોકાણકારો SIP ના માર્ગે રોકાણ જાળવી રહ્યા છે.

આ પણ વાંચોઃ FIIનું જબરદસ્ત કમબેક: Nifty 28,000, 30,000 કે 40,000 જશે? જાણો બ્રોકરેજના ટાર્ગેટ

આ પણ જુઓ

Watch onYouTube