NPSના રોકાણકારો ધ્યાન આપો! 1 ડિસેમ્બરથી લાગુ થશે આ નવા નિયમો

NPS New Rules: જો તમે National Pension System (NPS)માં રોકાણ કરો છો અથવા નવું ખાતું ખોલવાનું વિચારી રહ્યા છો, તો 1 ડિસેમ્બર 2026થી મહત્વપૂર્ણ ફેરફારો લાગુ થવાના છે. NPSનું નિયમન કરતી Pension Fund Regulatory and Development Authority (PFRDA)એ નવા નિયમો અંગે આદેશ જાહેર કર્યો છે. આ ફેરફારો ખાસ કરીને NPS સ્કીમના નામ અને Point of Presence (PoP) પ્લેટફોર્મ પર રોકાણકારોને આપવામાં આવતી માહિતી સાથે સંબંધિત છે.

NPS સ્કીમના નામ હવે વધુ સ્પષ્ટ રહેશે

નવા નિયમો હેઠળ NPS સ્કીમના નામ માટે એકસરખી પદ્ધતિ અપનાવવાની રહેશે. સ્કીમના નામમાં પેન્શન ફંડનું નામ, 'NPS' શબ્દ અને સ્કીમનું સ્પષ્ટ નામ દર્શાવવાનું રહેશે. એક જ પેન્શન ફંડની એકથી વધુ સ્કીમ હોય તો દરેક સ્કીમનું નામ અલગ અને સ્પષ્ટ રાખવું પડશે. ઉપરાંત, સ્કીમના નામમાં અત્યાર સુધી ઉપયોગમાં લેવાતા 'A થી E' જેવા કોડ દૂર કરવામાં આવશે. આ ઉપરાંત જાહેરાતોમાં સ્કીમ સાથે સંકળાયેલા જોખમની માહિતી પણ સ્પષ્ટ રીતે આપવાની રહેશે.

PoP પ્લેટફોર્મ પર તમામ વિકલ્પો દેખાશે

NPSમાં રોકાણ કરવા માટે ઉપયોગમાં લેવાતી એપ્સ, વેબસાઇટ્સ અને અન્ય પ્લેટફોર્મને Point of Presence એટલે કે PoP કહેવામાં આવે છે. નવા નિયમો હેઠળ આવા પ્લેટફોર્મ માટે પણ પારદર્શિતાના નિયમો નક્કી કરવામાં આવ્યા છે. જો રોકાણકાર કોઈ ચોક્કસ જોખમ સ્તર અથવા સ્કીમ પસંદ કરે છે, તો PoP પ્લેટફોર્મે તે કેટેગરીમાં ઉપલબ્ધ તમામ પેન્શન ફંડના વિકલ્પો દર્શાવવા પડશે. કોઈ એક ફંડને પ્રાધાન્ય આપવા માટે અન્ય વિકલ્પોને છુપાવી શકાશે નહીં. કોઈ ફંડને યાદીમાં ઉપર દર્શાવવામાં આવે તો પણ અન્ય ઉપલબ્ધ ફંડના વિકલ્પો દર્શાવવા જરૂરી રહેશે. આથી રોકાણકારો એક જ જગ્યાએ અલગ-અલગ વિકલ્પોની સરખામણી કરી શકશે.

રોકાણકારો માટે શું બદલાશે?

1 ડિસેમ્બર પછી NPSમાં રોકાણ કરતી વખતે રોકાણકારોને જોખમની પસંદગી અને તેના આધારે ઉપલબ્ધ સ્કીમના વિકલ્પો વધુ સ્પષ્ટ રીતે જોવા મળશે. આ પ્રક્રિયાથી રોકાણકારોને વિવિધ પેન્શન ફંડના વિકલ્પોની સરખામણી કરવાની વધુ સરળતા મળશે. સ્કીમના નામ અને જોખમ સંબંધિત માહિતી પણ વધુ સ્પષ્ટ રીતે રજૂ કરવાની રહેશે. આ નવા નિયમોનો મુખ્ય ફોકસ NPS રોકાણ પ્રક્રિયામાં વધુ પારદર્શિતા લાવવાનો અને રોકાણકારોને ઉપલબ્ધ વિકલ્પોની સ્પષ્ટ માહિતી આપવાનો છે.

આ પણ વાંચો: ખાંડના ભાવમાં મોટા વધારાની માંગ! AISTAએ ₹4,200નો ભાવ નક્કી કરવા કરી રજૂઆત

આ પણ જુઓ :

Watch onYouTube