તમારું હોમ એપ્લાયન્સ બજેટ બગડશે: જાણો વ્હર્લપૂલના ઉત્પાદનો કેમ થયા મોંઘા

Whirlpool India: જો તમે આ તહેવારોની મોસમમાં તમારા ઘર માટે નવું રેફ્રિજરેટર, એર કન્ડીશનર (એસી) અથવા વોશિંગ મશીન ખરીદવાનું આયોજન કરી રહ્યા છો, તો તમારે તમારું બજેટ થોડું વધારવું પડી શકે છે. ભારતમાં હોમ એપ્લાયન્સિસ (ઘરગથ્થુ ઉપકરણો) બનાવતી અગ્રણી કંપની વ્હર્લપૂલ ઓફ ઇન્ડિયાએ તેના તમામ ઉત્પાદનોના ભાવમાં આશરે 5 ટકાનો વધારો ઝીંકી દીધો છે. નવા ભાવો 1 નવેમ્બર, 2026 થી અમલમાં આવી ગયા છે.

ભાવ વધારા પાછળનાં મુખ્ય કારણો

વ્હર્લપૂલ કંપનીના જણાવ્યા અનુસાર, આ ભાવ વધારા પાછળ કેટલાક મુખ્ય આંતરરાષ્ટ્રીય અને સ્થાનિક પરિબળો જવાબદાર છે:

કાચા માલનો ફુગાવો: આંતરરાષ્ટ્રીય સ્તરે ભૌગોલિક-રાજકીય તણાવને કારણે ક્રૂડ ઓઇલના ભાવમાં વધારો થયો છે. આ ઉપરાંત, ઉત્પાદન માટે જરૂરી એવા તાંબુ, સ્ટીલ અને એલ્યુમિનિયમ જેવા કાચા માલના ભાવો પણ સતત વધી રહ્યા છે.

નબળો રૂપિયો: અમેરિકન ડોલરની સરખામણીમાં ભારતીય રૂપિયાના મૂલ્યમાં ઘટાડો થવાથી (અવમૂલ્યન), વિદેશથી આયાત કરવામાં આવતા સ્પેરપાર્ટ્સની કિંમતમાં નોંધપાત્ર વધારો થયો છે, જેનાથી કંપનીના ઉત્પાદન ખર્ચ પર મોટું દબાણ આવ્યું છે.

નવા ઉર્જા નિયમો: સરકાર દ્વારા રેફ્રિજરેટર અને એર કંડિશનર માટે લાગુ કરાયેલા નવા ઉર્જા ધોરણો (Energy Norms) ને કારણે પણ ઉત્પાદન ખર્ચમાં વધારો થયો છે.

પ્રીમિયમ સેગમેન્ટમાં રોકાણ: કંપની દ્વારા લક્ઝરી અને પ્રીમિયમ પ્રોડક્ટ્સના લોન્ચ માટે કરવામાં આવેલા મોટા રોકાણોએ પણ તેમના નફાના માર્જિન પર અસર કરી છે.

સમગ્ર ઉત્પાદન રેન્જ પર અસર

વ્હર્લપૂલે તેના સમગ્ર ઉત્પાદન પોર્ટફોલિયોમાં આશરે 5 ટકાનો વધારો કર્યો છે. દિવાળી જેવા મોટા તહેવારો દરમિયાન સામાન્ય રીતે ઇલેક્ટ્રોનિક્સની ખરીદીમાં ઉછાળો આવતો હોય છે, ત્યારે આ ભાવ વધારાથી સીધી અસર ગ્રાહકોના ખિસ્સા પર પડશે. માત્ર વ્હર્લપૂલ જ નહીં, પરંતુ ઓક્ટોબર મહિનાની શરૂઆતમાં પણ અન્ય ઘણી મોટી ઇલેક્ટ્રોનિક્સ કંપનીઓએ એસી, એલઇડી ટીવી અને વોશિંગ મશીનના ભાવમાં 5 થી 8 ટકાનો વધારો કર્યો હતો.

વ્હર્લપૂલની આવકમાં 14% નો વધારો

એક તરફ ભાવ વધારો ઝીંકવામાં આવ્યો છે, તો બીજી તરફ વ્હર્લપૂલ ઓફ ઈન્ડિયાએ સપ્ટેમ્બર ક્વાર્ટરમાં તેના વ્યવસાયમાં સારો એવો સુધારો નોંધાવ્યો છે. કંપનીની આવક (કોન્સોલિડેટેડ) ગયા વર્ષના સમાન સમયગાળાની સરખામણીમાં 14 ટકા વધીને 1,873 કરોડ રૂપિયા પર પહોંચી ગઈ છે. આ સમયગાળા દરમિયાન કંપનીનો EBITDA 40 કરોડ રૂપિયા અને કરવેરા પહેલાનો નફો (PBT) 34 કરોડ રૂપિયા નોંધાયો છે.

આ પણ વાંચોઃ 21.80 kmpl સુધીની માઇલેજ! આ છે ભારતની ટોચની 4 સૌથી સસ્તી ડીઝલ SUV, જુઓ લિસ્ટ

આ પણ જુઓ

Watch onYouTube